სამუშაო საათები: ორშ-პარ (10:00 - 18:00)

„შევაჩეროთ ოჯახური ძალადობა!“

15 დეკემბერს 11.00 საათზე საქართველოს ახალგაზრდა იურისტთა ასოციაციამ “ძალადობისაგან დაცვის ეროვნულ ქსელთან” ერთად ჩაატარა აქცია “შევაჩეროთ ოჯახური ძალადობა”! აქციის მონაწილეებმა რუსთაველისა და მარჯანიშვილის მეტროებთან, ფილარმონიის მიმდებარე ტერიტორიაზე, უნივერსიტეტის 1 კორპუსთან და ყოფილი სულხან-საბა ორბელიანის სახელობის პედაგოგიურ უნივერსიტეტთან სპეციალური ბუკლეტები და ბროშურები დაარიგეს. ოჯახური ძალადობა ადამიანის უფლებების დარღვევაა. იგი გლობალური სენია. ამ სენისაგან არცერთი საზოგადოება არ არის დაზღვეული. მიუხედავად იმისა, რომ საქართველოში ამ პრობლემის გარშემო საუბარი მასობრივ ხასიათს იღებს, საზოგადოების გარკვეული ნაწილი აღნიშნულ პრობლემას ვერ აცნობიერებს და არც კი აღქვამს ამ მოვლნას სოციალურ პრობლემად. საქართველოს ხელისუფლებამ ოჯახში ძალადობის პრობლემა აღიარა, რაც გამოიხატა 2006 წლის 25 მაისს საქართველოს პარლამენტის მიერ კანონის “ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ”. აღნიშნულიდან გამომდინარე საჭიროა მოსახლეობას მივაწოდოთ ინფორმაცია იმის თაობაზე რომ ოჯახში ძალადობის მსხვერპლს იცავს კანონი. ჩვენი აქციის ძირითადი მიზანიც მოსახლეობის ცნობიერების ამაღლება და მათი ინფორმირებულობაა. აქცია საია-ს მიერ ორგანიზებულ ადამიანის უფლებების კვირეულის ფარგლებში ჩატარდა.

2006-12-14 20:00 სრულად ნახვა

საია-მ კონკურსში გამარჯვებული ბავშვები დააჯილდოვა

15 დეკემბერს, სასტუმრო „თბილისი მერიოტის“ თამარ-მეფის საკონფერენციო დარბაზში, საქართველოს ახალგაზრდა იურისტთა ასოციაციამ ადამიანებით ვაჭრობის (ტრეფიკინგის) თემაზე სკოლებში გამოცხადებული თხზულებების კონკურსში გამარჯვებული ბავშვები დააჯილდოვა. 258 მოსწავლის ნამუშევრიდან საუკეთესო 10 შეირჩა: 1. ადგილი - დავით ჭელიძე (თბილისის 199-ე საჯარო სკოლა)2. ადგილი - ლელა ჯგერენაია (თბილისის მე-3 საჯარო სკოლა)3. ადგილი - თამარ ლუარსაბიშვილი (თელავის მე-2 საჯარო სკოლა)4. ადგილი - თეონა ასლანიშვილი (თბილისის85-ე საჯარო სკოლა)5. ადგილი - სოფო ბოკუჩავა (თბილისის 75-ე საჯარო სკოლა)6. ადგილი - ირმა გამახარია (ახალსოფლის საჯარო სკოლა)7. ადგილი - ქეთევან ფალიანი (მესტიის პირველი საჯარო სკოლა)8. ადგილი - მაია წკრიალაშვილი (სოფელ შაშვების საჯარო სკოლა)9. ადგილი - თამარ გიგანი (სოფელ ბაშქოის საჯარო სკოლა)10. ადგილი - დავით კობრავა (რუსთავის 24-ე საჯარო სკოლა) პირველი სამეული პერსონალური კომპიუტერით დაჯილდოვდა, დანარჩენ 7 მოსწავლეს კი VCD –Player-ები გადაეცათ. საქართველოს ახალგაზრდა იურისტთა ასოციაციამ ასევე უმასპინძლა პროექტის „არა _ ადამიანებით ტრეფიკინგს“ პირველი წლის შედეგების პრეზენტაციას. ღონისძიება საია-ს მიერ ორგანიზებულ ადამიანის უფლებების ფარგლებში ჩატარდა.

2006-12-14 20:00 სრულად ნახვა

„საქართველოს მთავრობა თაკარა მზის ქვეშ“ - რიგით მეხუთე ანტიკორუფციული საქმიანობის ამსახველი ანგარიშის პრეზენტაცია

14 დეკემბერს 15:00 საათზე სასტუმო თორში (ჭანტურიას ქ#10) საქართველოს ახალგაზრდა იურისტთა ასოციაციამ მოაწყო კამპანიის „საქართველოს მთავრობა თაკარა მზის ქვეშ“ - რიგით მეხუთე ანტიკორუფციული საქმიანობის ამსახველი ანგარიშის პრეზენტაცია. გამოცემა 2006 წლის სახელმწიფო ბიუჯეტში საქართველოს პრეზიდენტისა და მთავრობის სარეზერვო ფონდების განკარგვასთან დაკავშირებულ პრობლემურ საკითხებს მოიცავს. ანგარიში მომზადებულია ფონდ ღია საზოგადოების ინსტიტუტის მიერ დაფინანსებული საია-ს პროექტის - „ფინანსური გამჭვირვალობა და საჯარო დაწესებულებების ანტიკორუფციული მონიტორინგი“-ის ფარგლებში. პრეზენტაციაზე ესწრებოდნენ სახელმწიფო მოხელეები, არასამთავრობო ორგანიზაციებისა და მედიის წარმომადგენლები. ღონისძიება საიას მიერ ორგანიზებულ „ადამიანის უფლებების კვირეული“-ს ფარგლებში ჩატარდა.

2006-12-13 20:00 სრულად ნახვა

სასტუმრო “თბილისი მერიოტში” სოციალური კლიპების პრეზენტაცია გაიმართა

საია-ს მიერ ორგანიზებულ ადამიანის უფლებათა კვირეულის ფარგლებში სასტუმრო “თბილისი მერიოტში” სოციალური კლიპების პრეზენტაცია გაიმართა თემებზე. სიცოცხლის უფლება; უდანაშაულობის პრეზუმფცია; არასრულწლოვანთა უფლებები; საქართველოს ახალგაზრდა იურისტთა ასოციაცია ევროპის კავშირისა და ჰოლანდიური ფონდის ““Oxfam Novib””-ის მხარდაჭერით ახორციელებს პროექტს “სამართლებრივი სახელმწიფოს ხელშეწყობა საქართველოში”. სოციალური კლიპები სწორედ ამ პროექტის ფარგლებში სამართლებრივი ცნობიერების ამაღლების მიმართულებით მომზადდა. ამ თემების შერჩევა განპირობებული იყო ამ უფლებების და პრინციპის ხშირი და უხეში დარღვევის ფაქტებით. ჩვენი მიზანია ამ თემების ირგვლივ ვრცელებოდეს კანონის შესაბამისი ინფორმაცია, საზოგადოებას გაცნობიერებული ქონდეს ამ უფლებების დაცვის მნიშვნელობა და ყველამ დაიცვას ეს უფლებები.

2006-12-12 20:00 სრულად ნახვა

საია-ს სტუდენტებმა სკოლებში გაკვეთილი ჩაატარეს

12 დეკემბერს 11:30 საათზე საია-ს იურიდიული სწავლებისა და ინფორმაციის ცენტრის სტუდენტებმა სკოლის მოსწავლეებს ადამიანის უფლებების შესახებ გაკვეთილი ჩაუტარეს. თბილისის 151-ე, 166-ე და მე-6 სკოლებში მოსწავლეები 35 წუთის განმავლობაში ისმენდნენ გაკვეთილს იმის შესახებ თუ რა უფლება აქვს თითოეულ ადამიანს. ასევე საია-ს რეგიონალური ოფისების წარმომადგენლებმა ბათუმში, რუსთავში, ქუთაისსა და ოზურგეთშიც გაუწიეს ორგანიზება მსგავს აქციას.ღონისძიების მიზანი იყო ბავშვების დაინტერესება ადამაინის უფლებით რათა მეტი ყურადღება მიაქციონ მომავალში მათ დაცვას.

2006-12-11 20:00 სრულად ნახვა

საქართველოს ახალგაზრდა იურისტთა ასოციაციის წარმომადგენლებმა ანტიტრეფიკინგული მასალა გაავრცელეს

11 დეკემბერს 11 საათზე პროექტ “არა! ადამიანებით ტრეფიკინგის” ფარგლებში საქართველოს ახალგაზრდა იურისტთა ასოციაციის წარმომადგენლებმა საქართველოში მოქმედ საკონსულობთან (თურქეთი, გერმანია, საბერძნეთი და ა.შ.) ანტი-ტრეფიკინგული მასალა (ბუკლეტები, ღია ბარათები, სანიშნეები) გაავრცელეს. რომლებშიც ახსნილია ტრეფიკინგის დანაშაულის საშიშროება და მოყვანილია ასოციაციის ანტი-ტრეფიკინგული ცხელი ხაზის ნომრები თბილისსა და ბათუმში.ადამიანების ვაჭრობა (ტრეფიკინგი) წარმოადგენს ადამიანის უფლებების ერთ-ერთი სერიოზულ დარღვევას და ეს პრობლემა საქართველოში ძალზე აქტუალურია. არსებული მონაცემებით საკმაოდ მაღალია საქართველოს მოქალაქეთა უკანონო შრომითი მიგრაციის დონე. აქამდე საქართველო ტრეფიკინგის მსხვერპლების და სატრანზიტო ქვეყანად ითვლებოდა. 2006 წლიდან საქართველო მომხმარებლ ქვეყანას წარმოადგენს.

2006-12-10 20:00 სრულად ნახვა

საქართველოს ახალგაზრდა იურისტთა ასოციაციის თავმჯდომარემ და საქართველოს სახალხო დამცველმა ადამიანის უფლებათა მონუმენტი გახსნეს

10 დეკემბერს, 18:00 საათზე, სახალხო დამცველის აპარატის ეზოში, საქართველოს ახალგაზრდა იურისტთა ასოციაციის თავმჯდომარემ _ გიორგი ჩხეიძემ და საქართველოს სახალხო დამცველმა _ სოზარ სუბარმა ადამიანის უფლებათა მონუმენტი გახსნეს."ადამიანის უფლებათა ხე" _ ასე ქვია ქანდაკებას, რომელიც სპეციალურად ამ დღესთან დაკავშირებით მხატვარმა გუგა კოტეტიშვილმა დაამზადა.10 დეკემბერს მთელი მსოფლიო ადამიანის უფლებათა დღეს აღნიშნავს, რადგან ზუსტად 58 წლის წინ, 1948 წლის 10 დეკემბერს გაერთიენებული ერების ორგანიზაციის გენერალურმა ანსამბლეამ ადამიანის უფლებათა საყოველთაო დეკლარაცია მიიღო, რომელიც ადამიანის უფლებათა ფუნდამენტურ გარანტიებს აღიარებს.ადამიანის უფლებათა საყოველთაო დეკლარაცია პირველი საერთაშორისო აქტია, რომელმაც ადამიანის ყველა ფუნდამენტური უფლება და თავისუფლება გაართიანა და უნივერსალურ ღირებულებად აქცია. ისევე, როგორც მთელ მსოფლიოში, ადამიანის უფლებათა დაცვის საკითხი საქართველოშიც პრობლემად რჩება.საქართველოს ახალგაზრდა იურისტთა ასოციაციის ერთ-ერთი უმთავრესი მიზანი მისი დაარსების დღიდან ადამიანის უფლებათა დაცვაა. სწორედ ამიტომ, ჩვენ ვგეგმავთ სხვადასხვა ღონისძიებებს.

2006-12-09 20:00 სრულად ნახვა

მრგვალი მაგიდა ადვოკატებთან

პირველ დეკემბერს საქართველოს ახალგაზარდა იურისტთა ასოციაციაში გაიმართა ადვოკატებთან შეხვედრა, თემაზე კანონმდებლობა სასამართლოში წესრიგის დაცვასთან დაკავშირებით. ადვოკატებმა განიხილეს იურიდიულ საკითხთა კომიტეტის მიერ შემუშავებული საკანონმდებლო პაკეტი და გამოთქვეს თავიანთი კრიტიკული მოსაზრებები სხვადასხვა საკითხებზე. კანონპროექტიდან განსაკუთრებული ყურადღება დაეთმო სისხლის სამართლის საპროცესო კოდექსის 208-ე მუხლის იმ ნაწილს, რომლითაც იზღუდება სიტყვისა და გამოხატვის თავისუფლება და პასუხისმგებლობა დგება მოსამართლის საჯარო კრიტიკისათვის პროცესის დასრულების შემდგომ.  ამასთან, მნიშვნელოვან პრობლემებად დაისვა: პირის დაპატიმრება ზეპირი მოსმენისა და დაცვის უფლების გარეშე, სიტყვა “უპატივცემლობის” ფართო ინტერპრეტირება, მოსამართლის მიკერძოებულობისა და მათ მიერ მიღებული განკარგულების გაუსაჩივრებლობის საკითხები.

2006-12-03 20:00 სრულად ნახვა

ახალგაზრდა იურისტთა ასოციაციას საზოგადოება "ბილიკის" წევრები სტუმრობდნენ

29 ნოემბერს ახალგაზრდა იურისტთა ასოციაიციის ოფისში გაიმართა შეხვედრა საზოგადოება "ბილიკისა" და საიას წევრებს შორის. ბავშვის უფლებათა კლუბისა და ჟურნალისტიკის ჯგუფის წევრები ასოციაციის თავმჯდომარეს, გიორგი ჩხეიძეს შეხვდნენ და მიიღეს ამომწურავი ინფორმაცია ორგანიზაციის შექმნის, ისტორიისა და საქმიანობის შესახებ. შეხვედრის შემდეგ ბავშვებს შესაძლებლობა ჰქონდათ დაეთვალიერებინათ ორგანიზაციის ოფისი.

2006-11-22 20:00 სრულად ნახვა

კონსტიტუციური სარჩელის დასაშვებობის საკითხს საკონტიტუციო სასამართლო 2006 წლის 22 ნოემბერს განიხილავს

საქართველოს ახალგაზრდა იურისტთა ასოციაციამ საკონსტიტუციო სასამართლოში კონსტიტუციური სარჩელი შეიტანა. საია საქართველოს საგადასახადო კოდექსით გათვალისწინებული საგადასახადო საიდუმლოების (122-ე მუხლი) კონსტიტუციის 41-ე მუხლის პირველ პუნქტთან მიმართებით არაკონსტიტუციურად ცნობას ითხოვს. საქართველოს კონსტიტუციის 41-ე მუხლით აღიარებულია სახელმწიფო დაწესებულებებიდან საჯარო ინფორმაციის დაუბრკოლებლად მოპოვების უფლება. ინფორმაციის მოპოვების უფლების შეზღუდვა დასაშვებია მხოლოდ იმ შემთხვევაში, როცა ინფორმაცია თავისი არსით წარმოადგენს სახელმწიფო, კომერციულ ან პროფესიულ საიდუმლოებას. შესაბამისად, საქართველოს კონსტიტუცია არ ითვალისწინებს ინფორმაციის შეზღუდვის საფუძვლად საგადასახადო საიდუმლოებას. 22 ნოემბერს, განმწესრიგებელ სხდომაზე საკონსტიტუციო სასამართლო მიიღებს გადაწყვეტილებას კონსტიტუციური სარჩელის ასებითად განსახილველად მიღება, არ მიღების შესახებ.

2006-11-20 20:00 სრულად ნახვა