სამუშაო საათები: ორშ-პარ (10:00 - 18:00)

კოალიცია “მომავალი სიღარიბის გარეშე” დასავლეთ საქართველოს სტუმრობდა

საქართველოში მოსახლეობის დიდი ნაწილი, ინფორმაციის უქონლობისა თუ სხვა მიზეზების გამო კვლავ ძირითადი სამედიცინო მომსახურების გარეშე ცხოვრობს. 6 და 7 ივლისს, კოალიციამ “მომავალი სიღარიბის გარეშე” დასავლეთ საქართველოს მიმართულებით ავტო-ტური მოაწყო. კოალიციის წევრები (არასამთავრობო ორგანიზაციები: საქართველოს ახალგაზრდა იურისტთა ასოციაცია, საქართველოს ახალგაზრდა ეკონომისტთა ასოციაცია, Welfare Foundation და საერთაშორისო ორგანიზაცია Oxfam) ადგილობრივ მოსახლეობას შეხვდნენ და მათ ჯანდაცვის სახელმწიფო პროგრამები და სოციალურად დაუცველი ოჯახების მონაცემთა ერთიან ბაზაში რეგისტრაციის წესი გააცნეს.

2007-07-10 20:00 სრულად ნახვა

საიამ წიგნების პრეზენტაცია გამართა

საქართველოს ახალგაზრდა იურისტთა ასოციაციამ 10 ივლისს სასტუმრო "ქორთიარდ მარიოტში" წიგნების პრეზენტაციას "ინფორმაციის თავისუფლება საქართველოში" და "პერსონალური მონაცემების დაცვა - საზღვარგარეთის ქვეყნების გამოცდილება" - გამართა. პრეზენტაციაზე, რომელსაც საქართველოს პარლამენტის, სხვადასხვა სახელმწიფო დაწესებულების, არასამთავრობო ორგანიზაციებისა და მედიის წარმომადგენლები ესწრებოდნენ განხილულ იქნა ინფორმაციის თავისუფლებასა და პერსონალური მონაცემების დაცვასთან დაკავშირებით დღეს არსებული პრობლემები. ასევე საიამ საკუთარი რეკომენდაციები წარმოადგინა.

2007-07-09 20:00 სრულად ნახვა

საქართველოს ახალგაზრდა იურისტთა ასოციაციის ადვოკატების წარმატებული საქმეები (ივნისი)

1. საიას ადვოკატის დახმარებით 70 წლის მოხუცი პატიმრობიდან გაათავისუფლეს საიას იურიდიული დახმარების ცენტრი იცავდა მოქალაქე ვ.ა.-ს ინტერესებს. იგი დმანისის რაიონული სასამართლოს მიერ ცნობილ იქნა დამნაშავედ სსკ-ის 108-ე მუხლით, 236-ე მუხლის მე-2 ნაწილით (განზრახ მკვლელობა, იარაღის უკანონო შეძენა შენახვა) და  სასჯელის ზომად განესაზღვრა 8 წლით თავისუფლების აღკვეთა. ჯანმრთელობის მდგომარეობის გაუარესების გამო, იგი მოთავსებული იყო საქართველოს იუსტიციის სამინისტროს მსჯავრდებულთა და პატიმართა სამკურნალო დაწესებულებაში.70 წლის მოხუცი ვ.ა. სრულიად უსინათლოა, რაც დადასტურებულია მისი მკურნალი ექიმის მიერ გაცემული სამედიცინო დასკვნით. მას მრავალი მადლობები და  სახელმწიფო ჯილდოები აქვს  მიღებული ქვეყნის სამსახურში ერთგული დამსახურებისათვის.   სისხლის სამართლის კოდექსის 74-ე მუხლის თანახმად პირი სასჯელის მოხდისგან შეიძლება გათავისუფლდეს ხანდაზმულობის ასაკის მიღწევისას.საქართველოს შრომის, ჯანმრთელობისა და სოციალური დაცვის მინისტრის #72-ე ბრძანებით, სასჯელის შემდგომი მოხდისაგან შეიძლება გათავისუფლდეს მსჯავრდებული თუ იგი არის სრულებით უსინათლო.საქართველოს ახალგაზრდა იურისტთა ასოციაციის მიერ დაიწერა განცხადება სასჯელაღსრულების დაწესებულების მსჯავრდებულთა და პატიმართა სამკურნალო დაწესებულების დირექტორის სახელზე. მოვითხოვეთ მსჯავრდებულ ვ.ა.-ს ჯანმრთელობის მდგომარეობის გამოკვლევა.2007 წლის 16 აპრილს მსჯავრდებულ ვ.ა.-ს ჩაუტარდა გამოკვლევა თვალის სნეულებათა კლინიკაში და დაუდგინდა დიაგნოზი: მარჯვენა თვალის ოპერირებული აბსოლუტური გლაუკომა გართულებული კატარაქტა და მარცხენა თვალის ოპერირებული გლაუკომა გართულებული კატარაქტა. გამოკვლევის მიხედვით განკურნების პერსპექტივა არ არსებობს. აღნიშნული სამედიცინო დასკვნის მოპოვების საფუძველზე საქართველოს შრომის, ჯანმრთელობისა და სოციალური დაცვის მინისტრის #72-ე ბრძანების შესაბამისად მსჯავრდებული გათავისუფლებულ იქნა სასჯელის შემდგომი მოხდისგან (განსასჯელ ვ.ა.-ს დარჩენილი ჰქონდა 6 წელი).

2007-07-08 20:00 სრულად ნახვა

ქართული არასამთავრობო ორგანიზაციების წარმომადგენლების ვიზიტი პოლონეთში

საქართველოს ახალგაზრდა იურისტთა ასოციაცია წარმოადგენს “ფონდი ღია საზოგადოება-საქართველოს” პარტნიორ ორგანიზაციას პროგრამის “East East: Partnership Beyond Borders” ფარგლებში მიმდინარე პროექტის “პოლონური, მოლოვური და ქართული არასამთავრობო ორგანიზაციების სამოქალაქო აქტიურობის გაზრდა”.  ა.წ 25-30 ივნისს განხორციელდა პროექტის მესამე ეტაპი, რაც გამოიხატა ქართული და მოლდოვური არასამთავრობო ორგანიზაციების წარმომადგენლების ვიზიტით პოლონეთში.

2007-07-03 20:00 სრულად ნახვა

საიას კურსდამთავრებულებს დიპლომები და სერტიფიკატები გადაეცათ

28 ივნისს საქართველოს ახალგაზრდა იურისტთა ასოციაციის იურიდიული განათლების ხელშეწყობის ფონდმა 2006-2007 წლების კურსდამთავრებულებს სერთიფიკატები და დიპლომები გადასცა. ღონისძიების დასაწყისში საიას თავმჯდომარემ გიორგი ჩხეიძემ სტუდენტებს კიდევ ერთხელ შეახსენა ასოციაციის საწესდებო მიზანი პროფესიული განათლების მიღების თვალსაზრისით. გაიხსენა ის პირველი ნაბიჯები, როცა საიაში ყალიბდებოდა ალტერნატიული განათლების მიღების კერა – იურიდიული სწავლებისა და ინფორმაციის ცენტრის სტატუსით. საიას თავმჯდომარემ ასევე ცენტრის 10 წლიან გამოცდილებაზე, წარმატებულ კურსდამთავრებულებზე (რომელთაც საიას რეკომენდაციით ხელი შეეწყოთ დასაქმებაში) და იმ აუცილებლობაზე ისაუბრა რის გამოც საია მიერ იურიდიული განათლების ხელშეწყობის ფონდის დაფიძნდა.

2007-07-01 20:00 სრულად ნახვა

საიას განცხადებას გაერთიანებული სადისტრიბუციო ენერგოკომპანია ეხმაურება

25 ივნისს, საიას რუსთავის ფილიალში გამართულ ბრიფინგზე საქართველოს ახალგაზრდა იურისტთა ასოციაციის თავმჯდომარემ გიორგი ჩხეიძემ და საიას რუსთავის ოფისის იურისტებმა საქართველოს გაერთინებული სადისტრიბუციო ენერგოკომპანიის მიერ ჩადენილ დარღვევებთან დაკავშირებით ისაუბრეს. ბოლო სამი თვის განმავლობაში საქართველოს ახალგაზრდა იურისტთა ასოციაციის რუსთავის ოფისს დახმარებისთვის 71-მა მოქალაქემ მიმართა. რუსთაველები აცხადებენ, რომ მიუხედავად მასობრივი გამრიცხველიანებისა მათ ელექტრომრიცხველებზე დაფიქსირებულ ციფრებს ენერგოკომპანია არარეალურად მიიჩნევს და მოსახლეობას ჯარიმის სახით დამატებით გადასახადს აკისრებს.

2007-06-25 20:00 სრულად ნახვა

სემინარი ქვემო ქართლისა და სამცხე-ჯავახეთის ადგილობრივი ასოციაციების წარმომადგენლებისათვის

21 და 22 ივნისს საქართველოს ახალგაზრდა იურისტთა ასოციაციის მიერ პროექტის _ “სოფლის ასოციაციების როლის გაძლიერება საქართველოს დემოკრატიული პროცესების განვითარებაში” _ ფარგლებში ორგანიზებულ იქნა სემინარები თემაზე: არასამეწარმეო იურიდიული პირები (არასამთავრობო ორგანიზაციები და სამელიორაციო ასოციაციები). 21 ივნისს სემინარი ჩატარდა ქვემო-ქართლის ადგილობრივი ასოციაციების წარმომადგენლებისათვის, ხოლო 22 ივნისს _ სამცხე-ჯავახეთის ადგილობრივი ასოციაციების წარმომადგენელთათვის.

2007-06-24 20:00 სრულად ნახვა

40 მილიონიანი საგრანტო პროგრამის ხელშეკრულების სამართლებრივი ანალიზი

საქართველოს ახალგაზრდა იურისტთა ასოციაცია 2007 წლის აპრილიდან ახორციელებს პროექტს “ბაქო-თბილისი-ჯეიჰანის მილსადენის კომპანიასა და საქართველოს მთავრობას შორის გაფორმებული საგრანტო პროგრამის საზოგადოებრივი მეთვალყურეობა (II ეტაპი)”. პროექტის მთავარი მიზანია 2004 წელს ბაქო-თბილისი-ჯეიჰანის მილსადენის კომპანიის მიერ საქართველოს მთავრობისათვის გრანტის სახით გაცემული 40 მილიონი აშშ დოლარის ხარჯვის პროცესის მონიტორინგი. წარმოგიდგენთ პროექტის ფარგლებში მომზადებულ დოკუმენტს _ “ბაქო-თბილისი-ჯეიჰანის მილსადენის კომპანიასა და საქართველოს მთავრობას შორის საქართველოსათვის 40 მილიონიანი საგრანტო პროგრამის შექმნის შესახებ 2006 წლის 26 ივლისს ჩასწორებული და განახლებული საგრანტო ხელშეკრულების ანალიზი”. დოკუმენტი მოიცავს 40 მილიონიანი საგრანტო ხელშეკრულების ორივე რედაქციის (2004 წლის 19 ოქტომბერი, 2006 წლის 26 ივლისი) სამართლებრივ  ანალიზს. პროექტის მეორე ეტაპი ხორციელდება ფონდ “ღია საზოგადოება საქართველოს” ფინანსური მხარდაჭერით, “საჯარო ფინანსების გამჭვირვალობისათვის” საზოგადოებრივ ორგანიზაციათა კოალიციის ფარგლებში.

2007-06-17 20:00 სრულად ნახვა

საია მოუწოდებს საქართველოს პარლამენტს არ მიიღოს პრეზიდენტის ინიციატივის წესით წარდგენილი ცვლილება “მეწარმეთა შესახებ” საქართველოს კანონში

15 ივნისს საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტმა, პირველი მოსმენით მხარი დაუჭირა საქართველოს პრეზიდენტის ინიციატივით წარდგენილ კანონპროექტს, რომელიც ითვალისწინებს "მეწარმეთა შესახებ" საქართველოს კანონში 53-3 მუხლის კვლავ შემოტანას. ამ ცვლილების მიხედვით, სააქციო საზოგადოებაში 95% აქციების მფლობელ აქციონერს უფლება ეძლევა დარჩენილი 5% აქციების შესყიდვისა, იმის მიუხედავად, ექნება თუ არა 5% აქციების მფლობელ აქციონერ(ებ)ს საკუთარი აქციების გაყიდვის სურვილი. საქართველოს პარლამენტის მიერ წარმოდგენილი ცვლილების მიღება, იქნება საქართველოს საკონსტიტუციო სასამართლოს 2007 წლის 18 მაისის გადაწყვეტილების უხეში დარღვევა და სასამართლოს მიერ დადგენილი სამართლებრივი წესრიგის დაუმორჩილებლობა.

2007-06-14 20:00 სრულად ნახვა

ტრეფიკინგთან ბრძოლაში საქართველომ პირველ კალათში გადაინაცვლა

ამერიკის სახელმწიფო დეპარტამენტმა გამოაქვეყნა მორიგი წლიური ანგარიში მსოფლიოში ადამიანით ვაჭრობის შესახებ. არსებული დასკვნით, ტრეფიკინგის მსხვერპლთა რაოდენობა მსოფლიოში ყოველწლიურად 800 ათასს აღწევს. თანამედროვე მონები ძირითადად, ქალები და ბავშვები ხდებიან, რომლებიც ტრეფიკინგის მსხვერპლთა 80 პროცენტს წარმოადგენენ და უმეტესად სექსუალური ექსპლუატაციის მსხვერპლნი ხდებიან. ამერიკის კონგრესი ქვეყნებს სამი კალათის პრინციპის მიხედვით ყოფს. მესამე კალათაში ხვდებიან ქვეყნები, რომელთა მთავრობებიც არ მიმართავენ საჭირო ზომებს ტრეფიკინგთან საბრძოლველად და შესაბამისად ასეთ ქვეყნებს უწყვეტს დაფინანსებას. დღევანდელი მონაცემებით მესამე კალათაში 16 ქვეყანაა მოთავსებული. მეორე კალატაში ხვდებიან ისეთი ქვეყნები (ამ ეტაპზე 32 ქვეყანა), რომელთა მთავრობებიც მიმართავენ გარკვეულ ზომებს ამ დანაშაულის წინააღმდეგ საბრძოლველად, თუმცა მათი მუშაობა არც ისე ეფექტურია. პირველი კალათის ბინადარნი კი ის ქვეყნები არიან, რომლებიც დიდ წარმატებებს აღწევენ ამ სფეროში. დეპარტამენტის ექსპერტთა დასკვნით, საქართველომ შეფასების შკალის უმაღლეს საფეხურზე პირველ კალათაში გადაინაცვლა და შეუერთდა ტრეფიკინგის წინააღმდეგ ბრძოლის თვალსაზრისით ისეთ წარმატებულ ქვეყნებს, როგორიცაა: ავსტრია, ბელგია, დანია, საფრანგეთი, შვეიცარია, დიდი ბრიტანეთი, ლუქსემბურგი და ა.შ. ამ ანგარიშის თანახმად, წელს პირველ კალათაში გადაინაცვლა მხოლოდ სამმა სახელმწიფომ _ საქართველომ, უნგრეთმა და სლოვენიამ. საყურადღებოა ის ფაქტიც, რომ საქართველო კავკასიის რეგიონში ერთადერთი ქვეყანაა პირველი კალათიდან. ჩვენი ქვეყნის ამ წარმატებაში უდიდესი წვლილი მიუძღვის "საქართველოს ახალგაზრდა იურისტთა ასოციაციას", რომელიც უკვე 3 წელია წარმატებით ახორციელებს ანტი-ტრეფიკინგულ პროექტებს.

2007-06-14 20:00 სრულად ნახვა