მეტიც,  ფრაქცია „ქართული ოცნება - მრეწველების“ თავმჯდომარის ბატონი გოგი თოფაძის განცხადება იმასთან დაკავშირებით, რომ საქართველოში უნდა შეიზღუდოს და აიკრძალოს არასამთავრობო ორგანიზაციების საქმიანობა, აგრეთვე მათი დადანაშაულება ქვეყნის ძირგამომთხრელ საქმიანობაში, პარალელების გავლება ერაყთან, იუგოსლავიასთან, არაბეთის ქვეყნებთან არის  რუსეთის ფედერაციის ოფიციალური პოზიციის იდენტური ამ საკითხის მიმართ და შეიძლება ჩაითვალოს როგორც ღია მუქარა საყოველთაოდ აღიარებული დემოკრატიული ინსტიტუტების მიმართ. ამასთან ერთად, თავის საჯარო განცხადებებში ბატონი გოგი თოფაძე პირდაპირ ადანაშაულებს საქართველოს სტრატეგიულ პარტნიორს - შეერთებულ შტატებს, არასამთავრობოების მეშვეობით სახელმწიფო გადატრიალებების მოწყობის მხარდაჭერაში აღნიშნულ ქვეყნებში. „მრეწველების“, როგორც მმართველ კოალიციაში შემავალი პარტიის აღნიშნული პოზიცია საფრთხის ქვეშ აყენებს ასევე საქართველოს და დასავლეთის პარტნიორი სახელმწიფოების სტრატეგიული ურთიერთობას.

მიუხედავად იმ ფაქტისა, რომ „ქართული ოცნება“ არის სხვადასხვა პოლიტიკური გაერთიანებებისგან შემდგარი კოალიციური ერთობა, ვფიქრობთ, რომ ისეთ მნიშვნელოვან საკითხებზე, როგორც არის ქვეყნის საგარეო-პოლიტიკური და შიდა დემოკრატიული მოწყობის არჩევანი თანაბარწილად გაზიარებული უნდა იყოს მასში შემავალი ყველა პარტიის მიერ. ყოველ შემთხვევაში ამას ადასტურებს კოალიციის წინასაარჩევნო პლატფორმა.

 

ყოვლად წარმოუდგენელია, მაღალი პოლიტიკური კულტურისა და ტრადიციების ქვეყანაში ერთ პოლიტიკურ გაერთიანებაში შემავალ სუბიექტებს გააჩნდეთ განსხვავებული მიდგომა ისეთ სტრატეგიულ და ფუნდამენტურ საკითხებზე, როგორც არის ქვეყნის დემოკრატიული მოწყობის, უსაფრთხოებისა და საგარეო-პოლიტიკური ვექტორის საფუძვლები. შესაბამისად, ჩვენი ქვეყნისთვის ამ მნიშვნელოვან ჟამს, როდესაც საქართველო წარმატებით ცდილობს მოახდინოს ინტეგრაცია ევროკავშირთან, როდესაც პირველად მიღწეულია შეთანხმება საქართველოში ნატოს საწვრთნელი ცენტრის გახსნასთან დაკავშირებით, როდესაც რუსეთის ფედერაცია ახდენს ჩვენი ქვეყნის ტერიტორიების ანექსიას, მმართველი პოლიტიკური ძალის წარმომადგენლების მხრიდან მსგავსი შინაარსის განცხადებები ატარებს ქვეყნისთვის საგანგაშო და საზიანო ხასიათს და იმსახურებს საზოგადოების მხრიდან შესაბამის რეაგირებას.

 

მოვუწოდებთ „ქართული ოცნების“ კოალიციურ და პოლიტიკურ საბჭოებს იმსჯელონ და ადეკვატური რეაგირება მოახდინონ "ქართული ოცნების" კოალიციური საბჭოს წევრების განცხადებებზე, რადგან ქვეყნის ევროპული და ევრო-ატლანტიკური კურსი არის საქართველოს მოსახლეობის მიერ რეფერენდუმზე მხარდაჭერილი ღირებულება და არჩევანი, რომლისკენაც მიისწრაფის ჩვენი საზოგადოება. შესაბამისად, “ქართული ოცნების" კოალიციის ზოგიერთი წევრის მიერ გაკეთებული განცხადებები, რომ ეს თითქოსდა ბატონების გოგი თოფაძის და ზურაბ ტყემალაძის პირადი მოსაზრებებია, ვერ იქნება გაზიარებული ქართული საზოგადოების იმ უმრავლესობის მიერ, ვინც ჯერ კიდევ წლების წინ დააფიქსირა დასავლური კურსისადმი საკუთარი არჩევანი და ერთგულება.