საქმის ფაქტობრივი გარემოებები ასეთია: დავით მირცხულავას წინააღმდეგ აღიძრა სისხლის სამართლის საქმე, სომხეთის რესპუბლიკიდან 1998-1999 წლებში მიღებული ელექტროენერგიის ღირებულების ანაზღაურებისას დაშვებული სამართალდარღვევების ფაქტზე. საქართველოს სასამართლოს საბოლოო გადაწყვეტილებით დ. მირცხულავა ცნობილ იქნა დამნაშავედ სამსახურებრივი უფლებამოსილების ბოროტად გამოყენების და თაღლითობის ფაქტზე და მას მიესაჯა თავისულების აღკვეთა 6 წლისა და 7 თვის ვადით. 2008 წლის 14 იანვარს საქართველოს პრეზიდენტის შეწყალების საფუძველზე მომჩივანი გათავისუფლდა.

   

ევროპულ სასამართლოში წარდგენილ საჩივარში საია სასამართლოსგან მოითხოვდა დაედგინა მომჩივნის მიმართ კონვენციის მე-3 (წამების აკრძალვა), მე-5 § 1,3,4 (თავისუფლებისა და უსაფრთხოების უფლება), მე-6 § 2 ( უდანაშაულობის პრეზუმფცია) და მე-12 დამატებითი ოქმის პირველი მუხლის (დისკრიმინაციის საერთო აკრძალვა) დარღვევა. 2015 წლის 3 აპრილს საქართველოს მთავრობამ წარადგინა ცალმხრივი დეკლარაცია, რომელსაც მომჩივანი  დათანხმდა.

 

საქართველოს მთავრობამ წარდგენილი ცალმხრივი დეკლარაციის თანახმად, აღიარა კონვენციის შემდეგი მუხლების დარღვევა დ. მირცხულავას მიმართ: მე-3 მუხლი, პენიტენციურ დაწესებულებაში მის მიმართ გაწეული არასათანადო სამედიცინო დახმარების გამო, მე-5 § 1 და 3 მუხლი, მომჩივნის დაკავებისას არსებული ხარვეზებისა და დაკავების კანონიერების შეფასებისას სასამართლო გადაწყვეტილების დაუსაბუთებლობის გამო, ასევე მე-6 § 2  მუხლი, საქართველოს მაშინდელი პრეზიდენტის მიერ 2005 წლის თებერვალში გაკეთებული საჯარო განცხადებით მომჩივნის მიმართ უდანაშაულობის პრეზუმფციის დარღვევის გამო.   ამასთან, სახელმწიფომ დ. მირცხულავას სასარგებლოდ დარღვეული უფლებების კომპენსაციის მიზნით 5 000 ევროს  გადახდის ვალდებულებაც აიღო.

 

ევროპული სასამართლოს განჩინების აღსრულებაზე ზედამხედველობას ევროპის საბჭოს მინისტრთა კომიტეტი განახორციელებს. საია, როგორც მომჩივნის წარმომადგენელი, განჩინების აღსრულებას აქტიურად დააკვირდება.