ადამიანის უფლებების დარღვევის ფაქტებს, ხშირ შემთხვევაში, ადგილი აქვს დაბალი სამართლებრივი და სამოქალაქო ცნობიერების გამო. შესაბამისად, სამოქალაქო განათლება ჩვენთვის ტრადიციულ სტრატეგიულ მიმართულებას წარმოადგენს.

ჩვენ მოვიპოვეთ კარგი რეპუტაცია და საზოგადოების ნდობა, რაც მნიშვნელოვანი საწყისია მსგავსი პროექტების წარმატებისათვის. ჩვენი ფართომასშტაბიანი საინფორმაციო კამპანიების დაფარვის ზონა საკმაოდ დიდია, თუმცა, ასეთი კამპანიების ეფექტურობის ამაღლების მიზნით, მომავალში აქცენტი გაკეთდება იმგვარ მულტიპლიკატორებზე, რომლებიც გაზრდის საზოგადოებრივი ჯგუფების აზრის ფორმირებაზე გავლენის შესაძლებლობას. ამ მიმართულებით, განსაკუთრებული ყურადღება მიექცევა ინტეგრაციის დაბალი ხარისხის მქონე ჯგუფებს, მაგალითად, უმცირესობებს.

სტრატეგიული ქვეამოცანები: 

1. კანონის წინაშე თანასწორობის, შემწყნარებლობის და კანონის უზენაესობის პოპულარიზაცია 

2. საზოგადოების ინფორმირება სამართლებრივ საკითხებზე, მათ შორის, ადამიანის უფლებებსა და დაცვის მექანიზმებზე

შედეგები და ინდიკატორები

• აქტიურობა მედია სივრცეში ლიბერალური ფასეულობების პროპაგანდის მიზნით;
• ჩვენს პროფესიულ ხედვებსა და შეფასებებზე მოლოდინის ზრდა;
• ადამიანის უფლებათა დღეების და სხვა მნიშვნელოვანი თარიღების (მაგ. კონსტიტუციის დღე) მასშტაბური აღნიშვნა;
• ცხელი ხაზის პოპულარიზაცია და ყოველი კონკრეტული ადამიანისათვის გაწეულ დახმარებათა რაოდენობრივი და ხარისხობრივი ზრდა;
• სამართლებრივი საგანმანათლებლო ბეჭდვითი პროდუქციის რაოდენობა, რომელიც მუდმივად ვრცელდება მოსახლეობასთან გასვლით შეხვედრებზე, იურიდიული დახმარების ცენტრში, სხვადასხვა კამპანიისა და აქციის დროს. წელიწადში 10-20 პუბლიკაცია ტირაჟით 200-1500 ხელმისაწვდომი ხდება დაახლოებით 15000-მდე ადამიანისათვის;
• ადამიანის უფლებებზე მომზადებული სოციალური აუდიო და ვიდეო რგოლების, რადიო გადაცემების და საგაზეთო ჩანართების რაოდენობისა და გავრცელების არეალის ზრდა;
• ჩვენს სხვადასხვა პროგრამაში ჩართული მოხალისე სტუდენტების რაოდენობის ზრდა;
• ჩვენი ფილიალებისა და რეგიონული ოფისების მიერ ყოველწლიურად მოსახლეობასთან გასვლითი საინფორმაციო შეხვედრებისა და სპეციფიკური სამართლებრივი პრობლემების გამოსავლენი ავტო-ტურების რაოდენობის ზრდა. ყოველწლიურად 3000-მდე ადამიანის მონაწილეობა საიას შეხვედრებში ქვეყნის მასშტაბით. 
  
  

  << დაწყება < წინა 1 2 შემდეგი > ბოლოს >>